საავტომობილო გადაადგილება გუდაური-კობის მონაკვეთზე აღდგენილია
ზვავსაშიშროების მოხსნისთანავე, გუდაური-კობის მონაკვეთზე დაწყებული ინტენსიური გაწმენდითი სამუშაოს შედეგად ავტოტრანსპორტის მოძრაობა აღდგენილია. აღნიშნულთან დაკავშირებით რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტი იტყობინება.
თოვლისა და ლიპყინულის გამო დროებით არაგვისპირი-გუდაური-ლარსის მონაკვეთზე აკრძალულია მისაბმელიანი, ნახევრადმისაბმელიანი ავტოტრანსპორტისა და 30 ადგილზე მეტი ტევადობის ავტობუსების მოძრაობა. დანარჩენი სახის ავტოტრანსპორტის მოძრაობა გუდაური-კობის მონაკვეთზე დასაშვებია მოცურების საწინააღმდეგო ჯაჭვების გამოყენებით. ორი და მეტი წამყვნი ხიდის მქონე ავტოტრანსპორტის მოძრაობა მთელ გზაზე თავისუფალია.
