გიორგი გაჩეჩილაძე: თუ დედამიწაზე გლობალური დათბობა არ შეჩერდა - კატასტროფა გარდაუვალია!

  "მწვანეთა პარტიის" ლიდერის გიორგი გაჩეჩილაძის განცხადებით,  "თუ დედამიწაზე გლობალური დათბობა არ შეჩერდა - კატასტროფა გარდაუვალია".

  "დღევანდელი სამიტი და ის შეხვედრები, რომლებიც ნიუ-იორკში მიმდინარეობს კლიმატის სამიტზე, უმნიშვნელოვანესია  - თუ მოხერხდა შეთანხმება და დაითანხმეს  მსხვილი ქვეყნები - აშშ, რუსეთი და ჩინეთი -  რომლებიც ატმოსფეროს ძირითადი დამბინძურებლები არიან,  შესაძლებელია, კაცობრიობა გადარჩეს",-განაცხადა გიორგი გაჩეჩილაძემ დღეს "რეპორტიორში" გამართულ პრესკონფერენციაზე.

  გაჩეჩილაძის განცხადებით, სტიქიების, მიწისძვრების, ღვარცოფების, წყალდიდობების არეალში საქართველოს ტერიტორიის 70%-ია მოქცეული.

  "მთაგორიანი ქვეყანა გვაქვს და ძალიან მოწყვლადია ჩვენი ტერიტორია.  საქართველოს დაახლოებით 3000-მდე დასახლებული პუნქტი ამ რისკის არეალშია. 400 000 ოჯახზეა საუბარი. საქართველოში კი,  სულ  980 000 ოჯახია",-განაცხადა  გიორგი გაჩეჩილაძემ.