საქართველოს თავდაცვის მინისტრმა ირაკლი ალასანიამ ჟურნალისტებს განუცხადა, რომ ხელისუფლება დაიწყებს ძალიან აგრესიული საგარეო პოლიტიკური ნაბიჯების გადადგმას. მან უსაფრთხოებისა და კრიზისების მართვის საბჭოს დღევანდელი სხდომა და პრემიერ-მინისტრის მიერ უწყებებისთვის მიცემული დავალება შეაფასა იმის თაობაზე, რომ რუსეთ-აფხაზეთს შორის გასაფორმებელ ხელშეკრულებასთან დაკავშირებით საერთაშორისო საზოგადოების კონსოლიდაციის მიზნით ღონისძიებების გეგმა შეიმუშაონ.
"დღეს უსაფრთხოებისა და კრიზისების მართვის გაფართოებულ სხდომაზე განვიხილეთ აფხაზეთში ანექსიის დაწყებასთან დაკავშირებული ინფორმაცია. ჩვენი ხედვები მივაწოდეთ პრემიერ-მინისტრს და პრემიერმაც ამის შესაბამისად დაავალა უსაფრთხოების საბჭოს და საგარეო საქმეთა სამინისტროს, რომ ორშაბათამდე მოამზადოს გაწერილი პოლიტიკური გეგმა საგარეო აქტიურობების შესახებ - თუ როგორ უნდა აღუდგეს წინ ანექსიის ამ პროცესს ყველა სახელმწიფო უწყება. ამის შემდეგ დაიწყება უკვე ძალიან აგრესიული საგარეო პოლიტიკური ნაბიჯების გადადგმა", - განაცხადა ირაკლი ალასანიამ