საქართველოს პრეზიდენტმა გიორგი მარგველაშვილმა ფარული მოსმენების კანონპროექტს ვეტო დაადო და პარლამენტს ახალი ვარიანტი შესთავაზა. "ივერიონი" კომენტარისთვის უმრავლესობის წევრს გიგლა აგულაშვილს დაუკავშირდა.
-"ბოლო დღეებში მიმდინარე პროცესები, ჩემი აზრით, ერთის მხრივ, ქვეყნის დემოკრატიულობის ხარისხის ამაღლებას და, მეორეს მხრივ, პოლიტიკურ ძალებს შორის დიალოგის დეფიციტზე მიუთითებს. ვეტო მოსალოდნელი იყო მაღალი ალბათობით. პრეზიდენტის შემოთავაზებულ ვარიანტს ჯერ არ გავცნობივარ. მთავარია, დავინახო, რამდენად გამორიცხავს ეს მოდელი უკანონო მოსმენებს. ვეტოს დასაძლევად უმრავლესობის უმრავლესობას 76 ხმა, ანუ სრული მობილიზება სჭირდება".
-შეძლებს უმრავლესობა მობილიზებას და ვეტოს დაძლევას?
-ძნელი სათქმელია. წინა ორი დღის კენჭისყრებზე კანონს მაქსიმუმ 75-მა კაცმა დაუჭირა მხარი. პლუს ერთი ხმის მიმატება, ალბათ, არ გაჭირდება.
-და რამდენად სწორი იქნება პარლამენტის მხრიდან ვეტოს დაძლევა?
-გააჩნია რას გვთავაზობს პრეზიდენტი. ამ პროექტს მე მხარი არ დავუჭირე, მაგრამ ეს არ ნიშნავს, რომ პრეზიდენტის ვერსიას მივიღებ აპრიორი. იმედია, ჩემი კოლეგებიც კანონის დებულებების მიხედვით მიიღებენ თავის გადაწყვეტილებას.