ხვალ "რეფორმატორების" ორგანიზებით ენგურის ხიდთან მშვიდობიანი საპროტესტო აქცია "მივუახლოვდეთ აფხაზეთს" გაიმართება.
,,რეფორმატორების" ლიდერის, ირაკლი ღლონტის თქმით, აქციაში მონაწილეობას ის ადამიანები მიიღებენ, რომლებიც ქვეყნის პროდასავლურ კურსს იზიარებენ და დეოკუპაცია სურთ.
-,,მე მინდა, ხელისუფლებას მივმართო და ვთქვა, რომ რუსეთთან ურთიერთობას სუფთა ფურცლიდან ვერ დავიწყებთ. ჩვენ ვერ დავივიწყებთ უახლოეს წარსულში მომხდარ ომს და იმ სისხლს, რომელსაც ჩემი თაობის წარმომადგენლები ემსხვერპლნენ" – აღნიშნა ღლონტმა.
,,რეფორმატორების"" ორგანიზებით, აქცია ზუგდიდში 8 ნოემბერს, 13:00 სთ–ზე, ხოლო ენგურის ხიდთან 14:30–ზე გაიმართება, იქნება მშვიდობიანი და ფართომასშტაბიანი. დედაქალაქიდან რეგიონისკენ აქციის მონაწილეთა ავტოკოლონები გავლენ. აქციის ორგანიზატორების თქმით თბილისიდან გასულ ავტომანქანებს მოხალისეები შეუერთდებიან ხაშურიდან, ქუთაისიდან, ოზურგეთიდან და ბათუმიდან.
-"ჩვენ ვიღებთ ნებისმიერი პოლიტიკური ძალის გამოწვევას, რომელიც პროდასავლურ იდეებს იზიარებს. ამიტომ ყველას მოვუწოდებ, ვინც იზიარებს ამ პოზიციას, შემოგვიერთდეს. დილის 7 საათზე გავდივართ სააკაძის მოედნიდან, ტრანსპორტირება იქნება უზრუნველყოფილი. ჩვენ უნდა მივიდეთ რაც შეიძლება ახლოს ჩვენს აფხაზ თანამემამულეებთან, უნდა მივუახლოვდეთ აფხაზეთს. ნუ მივატოვებთ ერთმანეთს, როცა ერთმანეთს ვჭირდებით! შემოგვიერთდით"-მიმართა საზოგადოებას ირაკლი ღლონტმა.
ამასთანავე ცნობილი ხდება, რომ "რეფორმატორები" 15 ნოემბრის აქციას არ დაესწრებიან.