საპარლამენტო უმრავლესობის წევრის ელისო ჩაფიძე მედიით გავრცელებულ სკანდალურ ვიდეომასალებთან დაკავშირებით კომენტარს აკეთებს და სამართალდამცავი ორგანოების წინააღმდეგ მიზანმიმართულ პროპაგანდად აფასებს. ჩაფიძის აზრით, აუცილებელია დადასტურდეს აღნიშნული მასალის ავთენტურობა, აღნიშნულთან დაკავშირებით ჩაფიძემ დღეს გამართულ პრესკონფერენციაზე ისაუბრა.
პოლიციის უფროსმა ლეიტენანტმა გიორგი ბაბუნაშვილმა სკანდალური ჩანაწერები გაავრცელა და საქართველო დატოვა. მან ევროპაში პოლიტიკური თავშესაფარი ითხოვა. ერთ-ერთი ვიდეოჩანაწერის მთავარი გმირი სახელმწიფო უსაფრთხოების სააგენტოს უფროსის მოადგილის ლევან იზორიას ძმაა.
"უნდა დადასტურდეს აღნიშნული მასალის ავთენტურობა და გამოძიებულ იქნას, რამდენად შეესაბამება ის ფაქტები რეალობას, რომელიც ფირში იყო წარმოდგენილი.
ასევე, უნდა დადგინდეს, კონკრეტულ პიროვნებას რა მიზნები ამოძრავებს. არცერთ პოლიტიკურ ძალას თუ ორგანიზაციას სამართალდამცავი ორგანოების დისკრედიტაცია კარგს არაფერს მოუტანს. სამწუხაროდ, მეჩვენება, რომ გარკვეული ფარული ჩანაწერების განზოგადება და გადატანა ხდება იმ მრავალათასიან კოლექტივზე, რომელიც დღეს საქართველოში წესრიგის დაცვას ემსახურება. სამწუხაროდ, ეს იყო მიზანმიმართული პროპაგანდა სამართალდამცავი ორგანოების წინააღმდეგ", - განაცხადა ჩაფიძემ.