,,ნაციონალურ მოძრაობაში“ მიიჩნევენ, რომ NDI-ის ბოლო კვლევა ქვეყანაში მდგომარეობის გაუარესებაზე მიუთითებს. ენმ-ის წევრი, აკაკი მინაშვილის შეფასებით, საზოგადოებრივი განწყობები ადასტურებს, რომ მმართველმა გუნდმა უნდა დატოვოს ხელისუფლება.
,,ამ კვლევამაც დაადასტურა, რომ ქვეყანაში მდგომარეობა ყოველდღიურად უარესდება, ჩვენი მოქალაქეების ცხოვრება უფრო რთული არის, ქვეყანა მიდის გაღარიბებისაკენ და ამ ფონზე ქართულ ოცნებას არ აქვს არავითარი გეგმა, არავითარი ხედვა, არის სრული თვითკმაყოფილება ხელისუფლების მხრიდან, რაც კიდევ უფრო ართულებს ვითარებას სახელმწიფოში. ერთადერთი გამოსავალი, რომ ქვეყანა გაჯანსაღდეს და წავიდეს პოზიტივისკენ, წავიდეს წინ, ეს არის ის, რომ ქართულმა ოცნებამ დატოვოს ხელისუფლება. ყველა კვლევა, საზოგადოებრივი განწყობები, სწორედ ამას ადასტურებს, რაზეც ეხლა არის საუბარი”, - განაცხადა მინაშვილმა.
ეროვნულ-დემოკრატიული ინსტიტუტის (NDI) ბოლო კვლევის საველე სამუშაოები 17 ნოემბერი-7 დეკემბრის პერიოდში ჩატარდა. საქართველოს მასშტაბით გამოიკითხა 1881 ადამიანი. NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს CRRC–საქართველო.