სოზარ სუბარი ზუგდიდში დევნილთა საკითხების შემსწავლელი კომისიის მუშაობის შედეგებს გაეცნო

საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი ზუგდიდში დევნილთა საკითხების შემსწავლელი კომისიის მუშაობის შედეგებს გაეცნო.

დევნილთა სამინისტროს ცნობით, კომისიის მუშაობის პროცესში, მინისტრის მოადგილეებთან და სამინისტროს თანამშრომლებთან ერთად, აფხაზეთის მთავრობის, სახალხო დამცველის, საერთაშორისო და ადგილობრივი არასამთავრობო სექტორის წარმომადგენლებიც (UNHCR, LAG - კონსორციუმი სამართლებრივი დახმარება საქართველო, "სამეგრელოს ხმა") აქტიურად არიან ჩართულები.

ასევე, სოზარ სუბარმა ის ნგრევადი ობიექტებიც მოინახულა, საიდანაც სამინისტრო, ლევან სამხარაულის სახელობის სასამართლო ექსპერტიზის ეროვნული ბიუროს დასკვნის საფუძველზე, დევნილ ოჯახებს ახალაშენებულ კორპუსებში, კრიტერიუმებით შერჩევის გარეშე გადაიყვანს. ეს ობიექტებია: ე.წ. კარავი, დოსააფის ჩასახლება, მე-12 ტრესტის შენობა, ინგირის ჩასახლება, ორსანტია, აღმაშენებლის N87-ში ე.წ. ბარაკები და მოსკოვის ქუჩა N5-ში სამშენებლო ტრესტი. ის დევნილი ოჯახები (70-80 ოჯახი), რომლებიც აღნიშნულ ობიექტებში მუდმივად ცხოვრობენ, საცხოვრებელი ფართით უპირობოდ დაკმაყოფილდებიან.