ცემა-ტყეპა ,,ნაჭარმაგევში"-პოლიციელებმა და სპეცრაზმელებმა ერთმანეთი სცემეს
გორის რესტორნებში ტრადიციად ქცეულ ჩხუბის სერიებს პოლიციელები აქტიურად ,,უერთდებიან". რესტორან ,,ნაჭარმაგევში" მომხდარი მასშტაბური დაპირისპირების შემდეგ რეგიონის პოლიციის უფროსის თანამდებობას გიორგი ლოთუაშვილი ტოვებს. მისმა პოლიციელებმა სპეცრაზმელებს სძლიეს. შინაგან საქმეთა სამინისტრო კი, განმარტებისგან თავს იკავებს.
,,დაიწყო თუ არა აღნიშნულის ფაქტზე ოფიციალური გამოძიება?" - ამ კითხვაზე პასუხს შიდა ქართლის საინფორმაციო ცენტრი შინაგან საქმეთა სამინისტროს პრესსამსახურიდან დიდი ხანია ელოდება. სპეცრაზმელებსა და შს მთავარი სამხარეო, ასევე, გორის სამმართველოს თანამშრომლების, მათ შორის ხელმძღვანელ პოსტებზე მყოფი პირებს შორის მომხდარი ცემა-ტყეპის ფაქტი 2015 წლის აპრილის ბოლოს მოხდა.
,,ეს იყო სასტიკი ჩხუბი. იქ იყვნენ ცოლები, ახლობლები, მერე მოვიდნენ სამმართველოების უფროსები, ისინიც ჩაერთვნენ ცემა-ტყეპაში. სპეცრაზმელებს სასტიკად გაუსწორდნენ. ვერ გავიგეთ, რა დააშავეს, მაგრამ რაღაცის გამო, ფაქტობრივად, დასაჯეს" - გვითხრა ერთ-ერთმა თვითმხილველმა, რომელიც იმ დროს რესტორანში იყო.
აღნიშნულ დაპირისპირებას რეგიონის აწ უკვე ყოფილი უფროსი გიორგი ლოთუაშვილი არ ესწრებოდა. თუმცა შინაგან საქმეთა მინისტრის გადაწყვეტილებით, ამ თანამდებობას ტოვებს და მის ნაცვლად იაგო საური ინიშნება. ეს უკანასკნელი თავის დროზე, სკანდალების ფონზე უწყებიდან გაუშვეს და, თანაც, კადრების განყოფილებაში.
,,ამ ამბავს სპეცრაზმის უფროსი ,,მიაწვა" და ღირსების აღდგენის მიზნით რეგიონის პოლიციის უფროსის გათავისუფლება სამინისტროში მოითხოვა - გვითხრა წყარომ. ლოთუაშვილს მისი გუნდი ,,გაჰყვა", მათ შორის გორის შს სამმართველოს უფროსი.
რაც შეეხება ვიდეოჩანაწერებს, რომელიც ყველა რესტორანში დაცვის პოლიციის დაქვემდებარებაშია, მისი გასაჯაროების უფლება, მხოლოდ, სამინისტროს აქვს.
იმ შემთხვევაში, თუ სამინისტრო რესტორან ,,ნაჭარმაგევში" მომხდარი ფაქტის შესახებ ინფორმაციას მოგვაწვდის, მათ შორის პოლიციელების ქმედებების აღმნიშვნელ ვიდეო-ჩანაწერებს, შიდა ქართლის საინფორმაციო ცენტრი გამოაქვეყნებს.
ცნობისათვის, იაგო საური რეგიონის პოლიციის უფროსის თანამდებობიდან 2014 წლის 24 სექტემბერს გაუშვეს და მის ნაცვლად ქარელის პოლიციის უფროსი ლევან გენგაშვილი გადმოიყვანეს. გენგაშვილს ბრალად 2012 წელს ქარელის ცენტრში, დღისით-მზისით, ,,ქართული ოცნების" აქტივისტის გიორგი ბერუაშვილის ცემა ედებოდა. 2015 წლის 2 თებერვალს გენგაშვილიც მოხსნეს, ხოლო მის ნაცვლად რეგიონის საპატრულო პოლიციის მაშინდელი უფროსი გიორგი ლოთუაშვილი დანიშნეს.
წყარო: qartli.ge
