"პოლიცია და პროკურატურა ორივე უწყება ფორმირებულია და შეიძლება ვთქვათ, რომ ისინი ხალხის სამსახურში ჩადგა“, - ამის შესახებ პრემიერ-მინისტრმა ბიძინა ივანიშვილმა ჟურნალისტებთან შეხვედრისას განაცხადა.
მისივე თქმით, ერთ-ერთი პირველი დაპირება ქვეყანაში სამართლიანობის აღდგენა იყო და ამ კუთხით მუშაობა უკვე მიმდინარეობს.
„არ ვფიქრობ, რომ საჯარო მოხელეების დიდმა ნაწილმა სამსახურები დაკარგა, რადგან ვცდილობთ, მინიმალური საკადრო ცვლილებები განვახორციელოთ. გასუფთავების პროცესი კიდევ გაგრძელდება. ვისაც სისხლის სამართლის დანაშაული ჰქონდა, სულ ცოტა, სამსახურის დატოვება მოუწევს. მთავრობის ფორმირების პროცესი კარგად ვითარდება და სასჯელაღსრულების სამინისტროშიც ექსცესებით სავსე პროცესი სტაბილურდება", - აღნიშნა ბიძინა ივანიშვილმა.
პრემიერი სასამართლოსაც შეეხო და აღნიშნა, რომ აქამდე ეს უწყება მხოლოდ ერთი კაცის ინტერესებით ხელმძღვანელობდა.
"ოდესღაც მთელი სამართალდამცავი სისტემა მხოლოდ ადეიშვილზე იყო მორგებული. სასამართლოსთან დაკავშირებით იუსტიციის მინისტრს აქვს გარკვეული პრობლემები. დღეს შეგიძლიათ ნახოთ, რომ სასამართლოში ცვლილებები არ განხორციელებულა. ვცდილობთ, შევუნარჩუნოთ მას დამოუკიდებლობის ის ნაწილი, რაც ჰქონდა", - აღნიშნა ივანიშვილმა.
