ტარიფების შემცირებაში ბიძინა ივანიშვილს ელისო კილაძე დაეხმარება?!

დღეს ცნობილი გახდება, რეალურად რამდენი პროცენტით იქნება შესაძლებელი ბუნებრივ აირსა და ელექტროენერგიაზე ტარიფების შემცირება.

"პრაიმ-ტაიმის" პრესკლუბში გამართულ პრესკონფერენციაზე არასამთავრობო ორგანიზაციამ "ჩემი საქართველოს" ლიდერმა ელისო კილაძემ ინიციატივით მიმართა პრემიერ-მინისტრს, რომ შეიქმნა საგანგებო კომისია, რომელიც ბუნებრივი აირის და ელექტროენერგიის ტარიფების სტაბილიზაციასა და მის მონიტორინგზე იმუშავებს. ამ კომისიის თავმჯომარედ კი პრემიერ-მინისტრს სთავაზობს "ჩემი საქართველოს" გამგეობის წევრს შალვა მაჭავარიანს, რომელიც უკვე მრავალი წელია ტარიფების პრობლემებზე მუშაობს.

"საქართველო მოიხმარს 8 მილიარდ 800 მილიონ კბ.მ ბუნებრივ აირს, რომელიც სხვადასხვა წყაროებიდან მოგვეწოდება, ამიტომ ტარიფის დადგენა ბევრ ფაქტორზეა დამოკიდებული. სწორედ ამიტომ, ბუნებრივ აირზე ტარიფის შემცირება მხოლოდ 5-10%-ით არის შესაძლებელი. რაც შეეხება ელექტროენერგიას, ერთი კვ.სთ. თვითღირებულება 4.5 თეთრია, ხოლო რეალიზება 16 თეთრად ხდება. ტარიფის დასადგენად გასათვალისწინებელია როგორც მომხმარებლის, ასევე მომწოდებლის ინტერესები. ამიტომ ელექტროენერგიაზე ტარიფის შემცირება 10-15%-ით არის შესაძლებელი", _ განაცხადა შალვა მაჭავარიანმა.