ფრანგულ-ქართული ორგანიზაციები ქართულ სკოლებში ფრანგული ენის სწავლებას დააფინანსებენ.
თანამშრომლობის ხელშეკრულებას ხელი განათლებისა და მეცნიერების პირველმა მოადგილემ თამარ სანიკიძემ, საქართველოში ფრანგული ენის განვითარების ფონდის პრეზიდენტმა ჯაკ ფლორიმ და ფრანგული ინსტიტუტის დირექტორმა ჟილ კარასომ მოაწერეს. ხელშეკრულების თანახმად, საქართველოს საჯარო სკოლების დაწყებით კლასებში აღნიშნული ფონდიდან ფრანგული ენის შესწავლა დაფინანსდება.
პროგრამა 2013 წლის იანვრიდან შემდეგ სკოლებში ამოქმედდება: თბილისის 14-ე, 85-ე, 88-ე, 124- და 155-ე, ასევე ფოთის 5-ე , ქუთაისის 25-ე და გურჯაანის 1-ელ საჯარო სკოლებში.
აღნიშნული ფონდის შექმნის ინიციატივა საფრანგეთის ელჩს საქართველოში რენო სალენსას ეკუთვნის. ფონდის საპატიო ხელმძღვანელი საქართველოს პირველი ლედი სანდრა ელისაბედ რულოვსია.
პროგრამის ოფიციალური პრეზენტაცია 17 დეკემბერს საფრანგეთის ელჩის რეზიდენციაში გაიმართება. ღონისძიების გახსნაში მონაწილეობას განათლებისა და მეცნიერების მინისტრი გიორგი მარგველაშვილი, საგარეო საქმეთა მინისტრი მაია ფანჯიკიძე და საქართველოს პირველი ლედი სანდრა ელისაბედ რულოვსი დაესწრებიან.
