სუამის წევრი ქვეყნების მიერ ინიცირებული რეზოლუცია მიიღეს

გენერალური ასამბლეის 67-ე სესიაზე სუამის წევრი ქვეყნების მიერ ინიცირებულ რეზოლუციას  „გაეროსა და დემოკრატიისა და ეკონომიკური თანამშრომლობის განვითარების ორგანიზაცია სუამს შორის თანამშრომლობის შესახებ“  კენჭი ეყარა.

აღნიშნული დოკუმენტის თანახმად, ორ საერთაშორისო ორგანიზაციას შორის თანამშრომლობა გაღრმავდება და მას ინსტიტუციონალური სახე მიეცემა.

დოკუმენტის მიღება სუამის სივრცეში გაეროს სპეციალიზირებული სააგენტოების ჩართულობის გაძლიერების თვალსაზრისით ისეთ სფეროებშია მნიშვნელოვანი, როგორებიცაა ანტი-ტერორისტული საქმიანობა, ნარკოტიკების უკანონო ბრუნვა და ადამიანების ტრეფიკინგი, საზღვრების ინტეგრირებული მართვა და სხვა.

რეზოლუცია კონსენსუსით მიიღეს და სუამელ პარტნიორებს შორის კონსოლიდირებული თანამშრომლობის ეფექტურობას ნათლად ადასტურებს.

ქართული მხარე გამოთქვავს იმედს, რომ საერთაშორისო ორგანიზაციების ჩარჩოებში აზერბაიჯანთან, უკრაინასთან და მოლდოვასთან ურთიერთხელსაყრელი თანამშრომლობა კიდევ უფრო ფართო ხასიათს მიიღებს.