მოსამართლის თანაშემწის ახსნა-განმარტებასთან დაკავშირებით, კომენტარი ამ განმარტების ერთ-ერთმა ადრესატმა კოტე კუბლაშვილმა გააკეთა.
უზენაესი სასამართლოს თავმჯდომარე ითხოვს, რომ ეს საკითხი ობიექტურად და დეტალურად იქნას გამოძიებული. კუბლაშვილმა განაცხადა, რომ მან შესაბამისი მასალები უკვე გადასცა პროკურორს. იგი ითხოვს, რომ გამოძიების პროცესში უზრუნველყოფილი იყოს იმ ადამიანის უსაფრთხოება, რომელმაც ამ ფაქტის შესახებ საზოგადოებას აცნობა.
“იუსტიციის უმაღლეს საბჭოში დღეს გაიმართება სპეციალური სხდომა, სადაც მიიღებენ გადაწყვეტილებას, კონკრეტულად, რა შეფასება უნდა მისცენ ამ ფაქტს, როგორი უნდა იყოს რეაგირება. ძალიან დიდი იმედი მაქვს, რომ ამ საქმეს დეტალურად გამოიძიებენ. ასეთი რამის დაშვება არ შეიძლება არსად, რომ სპეცსამსახურები სასამართლოს თანამშრომლებისგან იღებდნენ მალულად ინფორმაციებს სასამართლოს შიგნით მიმდინარე პროცესების შესახებ“, - განაცხადა კუბლაშვილმა.
