რას ედავება გამოძიება ნიკა გვარამიას?

ტელეკომპანია „რუსთავი 2“-ის გენერალურ დირექტორს, იუსტიციისა და განათლების ყოფილ მინისტრს ნიკა გვარამიას ბრალს სავარაუდოდ,  ხვალ დღის პირველ ნახევარში წაუყენებენ.

როგორც „ივერიონს“ გვარამიას ადვოკატმა მამუკა ჭაბაშვილმა განუცხადა, დაკავებულისთვის ბრალის წაყენების ვადა ხვალ საღამოს 17:00 საათაზე იწურება.

მისი თქმით, დღეს ის ნიკა გვარამიას შეხვდა, რომელიც ბრალს არ აღიარებს.

„რაც შეეხება მდგომარეობას, ნორმალურად არის. თუ შეიძლება ნორმალური ეწოდოს ციხეში ყოფნას, მაშინ ფიზიკურად ნორმალურადაა“, - განაცხადა ჭაბაშვილმა.

მისივე თქმით, ზუსტად არ იცის, რა მუხლებით წაუყენებენ გვარამიას ბრალს, თუმცა ზეპირი ინფორმაციით, მას 393-ე და 238-ე მუხლებს ედავებიან, რაც ქრთამის აღებასა და ცრუ მეწარმეობაში დახმარებას ითვალისწინებს.

იუსტიციისა და განათლების ყოფილი მინისტრი, ამჟამად ტელეკომპანია „რუსთავი 2“-ის გენერალური დირექტორი ნიკა გვარამია გუშინ საღამოს დააკავეს.

დაკავებულს დიდი ოდენობით ქრთამის აღებასა და დანაშაულებრივ ქმედებაში ედება ბრალი. მისთვის ბრალის წარგენის ვადა ხვალ საღამოს იწურება.