კონცერტს შეუერთდება ბრიუსელიდან დაბრუნებული სამთავრობო დელეგაცია

    27 ივნისს საქართველოს სამთავრობო დელეგაცია ბრიუსელში ჩაიტანს ქართველი ხალხის მთავარ გზავნილს, რომლითაც კიდევ ერთხელ დასტურდება, რომ საქართველოს ევროპული გზა არის ჩვენი ურყევი ნება, - ამის შესახებ საქართველოს მთავრობის ადმინისტრაციის უფროსის მოადგილემ ნინო კობახიძემ ჟურნალისტებთან საუბრისას განაცხადა.

   ნინო კობახიძემ ასოცირების ხელშეკრულების დღესთან დაკავშირებით თბილისში დაგეგმილ საზეიმო კონცერტთან დაკავშირებით ისაუბრა, რომელიც 20:30 საათზე ევროპის მოედანზე გაიმართება.

   მისი განმარტებით, გრანდიოზულ კონცერტში მონაწილეობას მიიღებენ უცხოეთში მოღვაწე ქართველი ვარსკვლავები და ქართული ესტრადის მომღერლები. კონცერტს შეუერთდება ბრიუსელიდან დაბრუნებული სამთავრობო დელეგაცია. მოსახლეობას სიტყვით მიმართავენ საქართველოს პრემიერ-მინისტრი ირაკლი ღარიბაშვილი და პრეზიდენტი გიორგი მარგველაშვილი.

   "ჩვენი სურვილია, სრულიად საქართველოსთან ერთად გავიზიაროთ ეს სიხარული, რომელიც ასოცირების ხელშეკრულების ხელმოწერის დღეს ახლავს. ამ დღესთან დაკავშირებით 28 ივნისს საქართველოს პრემიერ-მინისტრი გამართავს მიღებას ბათუმში, რომელზეც დიპლომატიური კორპუსი იქნება მოწვეული", - აღნიშნა ნინო კობახიძემ.