ეკა ბესელია:-"ყველა ამ ცილისწამებაზე სასამართლოში მიბრძანდებიან და იქ აგებენ პასუხს"

   ეკა ბესელიას თქმით, მისი შვილი 25-30 აგვისტოს ქობულეთში, სასტუმრო "ჯორჯიან პალასში" იმყოფებოდა და ამ ინფორმაციის გაცემის უფლება სასტუმროს ადმინისტრაციას თავად მისცა.

   მისივე თქმით, რატი მილორავა იმ ცილისწამების გამო, რომელიც მის მიმართ ამ ბოლო დღეებში გაისმა, ძალიან მძიმე ფსიქოლოგიურ მდგომარეობაშია. ბესელიას განცხადებით, "სქაი ბარში" მომხდარ მკვლელობაში ბრალდებული რატი მილორავას მეგობარია.

   -"ამ ქვეყანაში მე მავალია ადამიანის უფლებების დაცვა. ამ ადამიანებს შორის არის საქართველოს ერთ-ერთი მოქალაქე რატი მილორავა, ადამიანი, რომელმაც საკმაოდ ბევრი ტრავმა მიიღო ჩემს გამო და მგონი, საკმარისია მასზე ასეთი ფსიქოლოგიური შეტევების განხორციელება. ის თბილისში არ ყოფილა, უკვე თვეზე მეტია. ბოლო კვირა აჭარაში იყო. ერთი ადამიანი არ არსებობს, რომელიც იტყვის, რომ რატი მთელი თვის განმავლობაში თბილისში ნახა. ძალიან მიკვირს, რომ ტელევიზიის ყურადღების ცენტრშიც კი მოექცა ორღობის ჭორის დონეზე გავრცელებული მეზღაპრეობა. ამაზე მაქვს მარტივი პასუხი: ყველა ამ ცილისწამებაზე სასამართლოში მიბრძანდებიან და იქ აგებენ პასუხს. ეს არის ჩემი გადაწყვეტილება და მიმაჩნია, რომ ამით უნდა დამკვიდრდეს ელემენტარული პასუხისმგებლობა იმ ადამიანების მიმართ, ვინც თავის თავს მედიის ნაწილს უწოდებს და თავს უფლებას აძლევს, თავის მიერ გამოგონილი ბინძური ცილისწამებით ადამიანებს ამხელა ფსიქოლოგიური ტრავმა მიაყენოს"-განაცხადა ეკა ბესელიამ.