დავით უსუფაშვილი: აპატურაიმ განაცხადა, რომ საერთაშორისო საზოგადოება საქართველოსგან მეტ სტაბილურობასა ელოდება!

საქართველოს პარლამენტის თავმჯდომარე დავით უსუფაშავილი NATO-ს გენერალური მდივნის სპეციალურ წარმომადგენელს სამხეთ კავკასიასა და ცენტრალურ აზიაში ჯეიმს აპატურაის შეხვდა. უსუფაშვილმა  შეხვედრის დროს განხილულ საკითხებზე ჟურნალისტებთან კომენტარი გააკეთა.

"როგორც აპატურაიმ აღნიშნა, სამინისტროში ვიზიტის შემდეგ დარწმუნდა, რომ არათუ რაიმე ცვლილებაა პოლიტიკურ კურსში, არამედ ძალიან ტექნიკურ დონეზე ყველა საკითხი და თემა მიდის, ვითარდება ისე, როგორც დაგეგმილი იყო და როგორი მოლოდინი იყო. თუმცა აპარტურაიმ აღნიშნა, რომ შიდა პოლიტიკური ცხოვრება შიდა პოლიტიკური ცხოვრებაა და ქართველებისა და მათ შორის, პოლიტიკური ძალების გადასაწყვეტია, მაგრამ საერთაშორისო საზოგადოება საქართველოსგან მეტ სტაბილურობასა და მეტ დაფიქრებას ელოდება ისეთ დროს, როდესაც მსგავსი საკითხები ხდება ხოლმე. ჩვენ ვისაუბრეთ იმაზეც, რომ 2016 წელი არის ძალიან მნივნელოვანია, როგორც ქვეყნის შიგნით, ისე ქვეყნის გარეთ. 2016 წლის გაზაფხულზე NATO-ს მორიგი სამიტია დაგეგმილი, ამ დროისთვის უკვე განხორციელებული პროექტების, მათ შორის, სასწავლო ცენტრისა და სხვა ღონისძიებების თაობაზე NATO ჩვენი მხრიდან პროგრესს  ელის. მეც ვუთხარი, რომ 2016 წელი ძალიან მნიშვნელოვანია, რადგან საპარლამენტო არჩევნებია და ჩვენ, მმართველი პოლიტიკური გუნდი, ყველაფერს ვაკეთებთ იმისთვის, რომ პირნათლად შევხვდეთ იმ მნიშვნელოვან მოვლენას ყველა მიმართულებით, მათ შორის, NATO-ში ინტეგრაციის მიმართულებით", - განაცხადა  უსუფაშვილმა.