საქართველოს პრეზიდენტმა გიორგი მარგველაშვილმა რუსეთის მიერ მომზადებულ ხელშეკრულებას საქართველოს ტერიტორიული მთლიანობის წინააღმდეგ გადადგმული კიდევ ერთი ნაბიჯი უწოდა. საქართველოს პრეზიდენტმა საგანგებო განცხადება გააკეთა:
"რუსეთის ფედერაციასა და აფხაზეთს შორის მოკავშირეობისა და ინტეგრაციის შესახებ ხელშეკრულება არის საქართველოს სუვერენიტეტისა და ტერიტორიული მთლიანობის წინააღმდეგ გადადგმული კიდევ ერთი უხეში ნაბიჯი. ასეთი შინაარსის ხელშეკრულების გაფორმება გააუარესებს უსაფრთხობას შავი ზღვის აუზსა და კავკასიის რეგიონში. ხელშეკრულების გაფორმება ეწინააღმდეგება ჟენევის კონსულტაციების ფორმატს. ეს ხელშეკრულება საფრთხეს უქმნის ჩვენი ქვეყნის თავდაცვისუნარიანობას. ამ ხელშკრულების ამოქმედების შემთხვევაში გაუარესდება ჰუმანიტარული ვითარება და ადამიანის უფლებათა დაცვა რეგიონში. რეალური საფრთხის წინაშე დადგება, აფხაზების, როგორც საქართველოს განუყოფელი ნაწილის, თვითდამკვიდრება და იდენტობის მომავალი.
გამომდინარე იქიდან, რომ საქართველოში საშინაო და საგარეო პოლიტიკის განმსაზღვრელი არის საქართველოს პარლამენტი, მივმართავ პარლამენტს, უსწრაფეს პერიოდში განიხილოს არსებული ვითარება და შეიმუშაოს პოზიცია. ამ პოზიციაზე დაფუძნებით ჩვენ მოვიწვევთ უშიშროების საბჭოს და დავგეგმავთ შემდეგ ნაბიჯებს ვითარების დასტაბილურებასთან დაკავშირებით. ასევე მივმართავ საერთაშორისო თანამეგობრობას - ადეკვატურად შეაფასონ ვითარება და მისცენ შესაბამისი რეაგირება ჩვენი ქვეყნის სუვერენიტეტის წინააღმდეგ კიდევ ერთ გადადგმულ ნაბიჯს", - განაცხადა გიორგი მარგველაშვილმა.
