სოფლის მეურნეობის სამინისტრო 160 000 დოლარის ღირებულების ავტომობილს შეიძენს
საქართველოს მთავრობამ დღევანდელ სხდომაზე იმ განკარგულების პროექტი დაამტკიცა, რომელიც სამსახურებრივი ავტომანქანების შესყიდვას უკავშირდება. ამის მიხედვით, სოფლის მეურნეობის სამინისტრო საერთო ჯამში დაახლოებით 160 000 დოლარის ღირებულების 7 ახალ ავტომობილს შეიძენს.
"მოგეხსენებათ, არსებობს ახალი წესი, რომელიც განკარგავს ავტომობილების ფლობის პირობებს. ჩვენ ამ შემთხვევაში გამოვიტანეთ დამატებით 6 ავტომობილის შესყიდვის თხოვნა. ეს გახლავთ პროექტების მართვის სააგენტოსთვის. როგორც იცით, ძალიან ბევრი ახალი საწარმოა და შესაბამისად სჭირდება მონიტორინგი. გარდა ამისა, დამატებით 1 ავტომობილი განკუთვნილია ღვინის ეროვნული სააგენტოსთვის, სადაც ჩვენ ძალიან ბევრ პროგრამას ვგეგმავთ. შესაბამისად, მათ ჰქონდათ ერთი მანქანის ნაკლებობა და ვთვლით, რომ აუცილებელია შევსება. ეს არის მესამე კატეგორიის ავტომობილი", - განაცხადა ოთარ დანელიამ.
