დავით ნარმანია: საცობების პრობლემის აღმოსაფხვრელად თბილისის მერიაში სამუშაო ჯგუფი შეიქმნება!
საცობების პრობლემის აღმოსაფხვრელად თბილისის მერიაში სამუშაო ჯგუფი შეიქმნება. აღნიშნული განცხადება თბილისის მერმა დავით ნარმანიამ დღეს თბილისის მერიაში გამართულ შეხვედრაზე გააკეთა.
ნარმანიამ შეხვედრას წინამოსამზადებელი შეხვედრა უწოდა და აღნიშნა, რომ საცობების პრობლემის მოსაგვარებლად შესაქმნელ ჯგუფში შევლენ მერიის, საკრებულოს, ეკონომიკის სამინისტროს, შს სამინისტროს, ტექნიკური უნივერსიტეტის, ასევე საექსპერტო ორგანიზაციების წარმომადგენლები.
როგორც ნარმანიამ განაცხადა, საკითხი დღეისთვის ძალიან აქტუალურია, მათ ხელისუფლებაში მოსვლამდე ამ პრობლემასთან დაკავშირებით სერიოზული ნაბიჯები არ გადადგმულა. მომავალი წლის ბიუჯეტში გათვალისწინებულია პუშკინის ქუჩაზე ორმხრივი მოძრაობის აღდგენა და "ლაგუნა ვერეს" მიმდებარე ტერიტორიაზე გზის საფარის გაფართოება.
