„მთავრობა პანიკის ნიშნებს ავლენს“

ნაციონალური მოძრაობა ავრცელებს ინფორმაციას, რომ მთავრობა 21 მარტის აქციის ჩატარებისთვის ხელის შეშლას ცდილობს. ლევან ბეჟაშვილმა დღეს ამ თემაზე სპეციალური ბრიფინგი გამართა.

ნაციონალური მოძრაობის წევრის მტკიცებით, კანცელარიაში ყოველდღიურად იმართება შეხვედრები სახელმწიფო რწმუნებულებთან, გამგებლებთან და მერებთან. მიმდინარეობს მზადება იმისათვის, რომ 21 მარტს მოსახლეობა რეგიონებიდან არ ჩამოვიდეს. ლევან ბეჟაშვილის თქმით, სოფლებში დადიან რწმუნებულები და ცრუ დაპირებებს აძლევენ მოსახლეობას იმის შესახებ, რომ აამუშავებენ სხვადასხვა სახელმწიფო პროგრამას და განახორციელებენ სოფლის პროექტებს.  

"ბოლო დღეების განმავლობაში მთავრობა ავლენს პანიკის ნიშნებს. კიდევ ერთხელ მოვუწოდებთ მათ, შეწყვიტონ ტყუილების კამპანია და დაანებონ თავი 21 მარტთან დაკავშირებით მოსახლეოის დაშინებას," - განაცხადა ლევან ბეჟაშვილმა.