საპარლამენტო დელეგაცია გერმანიაში მიემგზავრება
ხვალ საქართველოს პარლამენტის დელეგაცია გერმანიის საგარეო საქმეთა სამინისტროს, ბუნდესტაგის და ფედერალური მთავრობის მიწვევით, ბერლინში გაემგზავრება და კონფერენციას სახელწოდებით - "ძალაუფლების გადანაწილება და პლურალიზმი გერმანიის პოლიტიკურ სისტემაში“ დაესწრება.
ოთხდღიანი ვიზიტის ფარგლებში, პარლამენტის თავმჯდომარის მოადგილე ზურაბ აბაშიძე ბუნდესტაგის ვიცე-პრეზიდენტს, ვოლფგანგ თირზეს შეხვდება.
დეპუტატები შეხვედრებს გამართავენ ბუნდესტაგში და საგარეო საქმეთა სამინისტროში. ისინი ასევე შეხვდებიან ეკონომიკის აღმოსავლეთ კომიტეტის წევრებს და ეწვევიან პოტსდამის უნივერსიტეტს.
დელეგაციის შემადგენლობაში საპარლამენტო უმრავლესობიდან შედიან: ზურაბ აბაშიძე; ეკატერინე ბესელია; ირაკლი სესიაშვილი; ლევან ბერძენიშვილი და გიგლა აგულაშვილი, ხოლო უმცირესობიდან - დავით დარჩიაშვილი და გიორგი კარბელაშვილი.
ვიზიტი 14 დეკემბრამდე გაგრძელდება.
