Iverioni
«    ივნისი 2018    »
 123
45678910
11121314151617
18192021222324
252627282930 
ივნისი 2018 (9)
მაისი 2018 (9)
აპრილი 2018 (16)
მარტი 2018 (14)
თებერვალი 2018 (10)
იანვარი 2018 (7)
14-04-2014, 19:24
ნანახია: 620

23-ე ბატალიონი ავღანეთში ISAF -ის მისიის შესასრულებლად ჩავიდა

ავღანეთში, ჰელმანდის პროვინციაში, ბაზა „ლეზერნეკზე“ საქართველოს შეიარაღებული ძალების მე-2 ქვეითი ბრიგადის 23-ე ბატალიონი სრული შემადგენლობით ჩავიდა. ქართველი სამხედრო მოსამსახურეები ISAF-ის მისიის ფარგლებში ჰელმანდის პროვინციაში აშშ-ს საზღვაო ქვეითების დაქვემდებარებაში მომავალი 6 თვის განმავლობაში იმსახურებენ.

საქართველოს თავდაცვის სამინისტროს ინფორმაციით, ოპერაციის რაიონის გადაბარებამდე 23-ე ბატალიონის პირადი შემადგენლობა ამერიკელი საზღვაო ქვეითების და ქართველი ინსტრუქტორების ხელმძღვანელობით ბაზა „ლეზერნიკზე“ დასკვნით სწავლებას გაივლიან.ქართველი ჯარისკაცები შემაჯამებელ წვრთნებს ისეთ საკითხებში გადიან, როგორიცაა: თვითნაკეთი ასაფეთქებელი ნივთიერებებების (IED) საწინააღმდეგო მოქმედებები, ნარკოტიკები, რელიგიური თავისებურებები, ნავიგაციის ჩამხშობი სისტემების გამოყენება, უსაფრთხოება და ბრძოლაში ჩართვის წესები.

გარდა ამისა, ქართული ბატალიონის მძღოლები დამატებით მომზადებას გადიან ექსტრემალურ პირობებში ჯავშანმანქანა MRAP-ის ე.წ. “Mine-roller”-ით (ჯავშანმანქანის ნაღმსაწინააღმდეგო მოწყობილობა) ტარებაში. ავღანეთში ჩასვლამდე, ნატო–ს ეგიდით წარმოებულ ISAF-ის სამშვიდობო ოპერაციაში მონაწილეობის მისაღებად ქართულმა დანაყოფმა ექვსთვიანი ინტენსიური მომზადება ეროვნულ სასწავლო ცენტრ „კრწანისში“ გაიარა.

თავდაცვის უწყების განცხადებით, ქართული ქვედანაყოფი  სრული სპექტრის ოპერაციების ჩასატარებლად მომზადდა-  მათ დაცვის, ჩხრეკის, წმენდისა და კორდონის, ასევე კონვოის ოპერაციები, დაშავებულთა ევაკუაციის პროცედურები და ადგილობრივ მოსახლეობასთან და ლიდერებთან ურთიერთობები შეისწავლეს.

ბატალიონის პირადი შემადგენლობა გერმანიის ქალაქ ჰოჰენფელსშიც იმყოფებოდა, სადაც სამხედრო წვრთნებს აშშ-ის გაერთიანებული მრავალეროვნული მზადყოფნის ცენტრში (JMRC) გადიოდა. ჯარისკაცების მომზადების დონე და მათი მზადყოფნა კონკრეტული ამოცანების შესასრულებლად დადებითად შეაფასეს როგორც ცენტრის ექსპერტებმა, ისე ამერიკელი საზღვაო ქვეითების ტრენერთა და მრჩეველთა ჯგუფმა.