პაატა ზაქარეიშვილი:გამორიცხულია,რუსეთმა საქართველოს ტერიტორიული მთლიანობა აღადგინოს,თუ NATO-ში გაწევრიანებაზე უარს ვიტყვით

შერიგებისა და სამოქალაქო თანასწორობის საკითხებში სახელმწიფო მინისტრმა პაატა ზაქარეიშვილმა პარლამენტში, რამდენიმე კომიტეტის გაერთიანებულ სხდომაზე განაცხადა, რომ გამორიცხულია, რუსეთმა საქართველოს ტერიტორიული მთლიანობა აღადგინოს, თუ ოფიციალური თბილისი ევროკავშირსა და NATO-ში გაწევრიანებაზე უარს იტყვის.

"არსებობს მოსაზრება, რომ თუ უარს ვიტყვით NATO-სა და ევროკავშირზე, რუსეთი საქართველოს ტერიტორიულ მთლიანობას აღადგენს. ეს გამორიცხულია. ჩვენ ერთხელ უკვე გვქონდა ეს პოზიცია, როდესაც ედუარდ შევარდნაძემ ომის შემდეგ შემოგვთავაზა, შევიდეთ დსთ-ში და აფხაზეთსა და ე.წ. სამხერთ ოსეთში პრობლემები მოგვარდებაო. დავინახეთ, რომ პირიქით მოხდა. ჩემთვის პირველ რიგში ღირებულებებს აქვს მნიშვნელობა. NATO-ს წევრი ქვეყნის ღირებულებებია დემოკრატიული ღირებულებები, ამიტომ ჩემთვის მნიშვნელოვანია ამ მიმართულებით მოძრაობა", - განაცხადა პაატა ზაქარეიშვილმა.

მისი თქმით, NATO-ს არც ერთ წევრ ქვეყანაში ალიანსის შექმნის შემდეგ საომარი მოქმედებები არ ყოფილა, მაშინ როცა ვხედავთ, დსთ-ის შემთხვევაში რაც ხდება.

"არ ვსაუბრობ მარტო საქართველო-რუსეთის კონფლიქტზე, ავიღოთ, უკრაინაში რა ხდება. დსთ-ის წევრი ქვეყნები არიან იგივე აზერბაიჯანი, სომხეთი", - განაცხადა პაატა ზაქარეიშვილმა.

ამის პარალელურად ზაქარეიშვილმა განაცხადა ისიც, რომ მაქსიმალურად დალაგებული ურთიერთობა უნდა გვქონდეს რუსეთთან, რომ მისმა ფაქტორმა NATO-სა და ევროკავშირში გაწევრიანებაში ხელი არ შეგვიშალოს.