საქართველოს ენერგეტიკის მინისტრი კახა კალაძე ბაქოში იმყოფება. 8-9 სექტემბერს "აღმოსავლეთ პარტნიორობის" მეოთხე არაფორმალური დიალოგის ფარგლებში 7 წევრი ქვეყნის ენერგეტიკის მინისტრებისა და საგარეო საქმეთა მინისტრების შეხვედრები იმართება.
დღეს დაგეგმილი შეხვედრის ფარგლებში კახა კალაძე დაესწრება "აღმოსავლეთ პარტნიორობის" წევრი ქვეყნების ენერგეტიკის მინისტრების შეხვედრას, რომელშიც მონაწილეობენ: ევროკომისიის ვიცე-პრეზიდენტი და ენერგოკომისარი გიუნტერ ოტინგერი, კომისარი ევროკავშირის სამეზობლო პოლიტიკისა და გაფართოების საკითხებში შტეფან ფულე, უკრაინის ენერგეტიკისა და ქვანახშირის ინდუსტრიის მინისტრი იური პროდანი, მოლდოვის ვიცე-პრემიერი და ეკონომიკის მინისტრი ადრიან ქანდუ და აზერბაიჯანის ენერგეტიკის მინისტრი ნატიგ ალიევი.
მხარეები განიხილავენ "სამხრეთ ენერგეტიკული დერეფნის" განვითარების მნიშვნელობას, როგორც ევროპის ენერგომომარაგების ალტერნატიულ დერეფანს.
"აღმოსავლეთ პარტნიორობის" წევრი ქვეყნები "სამხრეთ ენერგეტიკული დერეფნის" განვითარების მნიშვნელობაზე ისაუბრებენ
გააზიარე სტატია
