მანანა კობახიძე: გამოწვევად რჩება ეკონომიკური პრობლემების მოგვარება!

  პარლამენტის თავმჯდომარის მოადგილე მანანა კობახიძე კოალიცია "ქართული ოცნების" ხელისუფლებაში ყოფნის 2 წელს აფასებს.

  "გამოწვევად რჩება ეკონომიკური პრობლემების მოგვარება, უმუშევრობის დაძლევა, ტერიტორიული მთლიანობა. ეს არის ის საკითხები, რომლებიც არის და უნდა იყოს  ხელისუფლების ყოველდღიური საზრუნავი.

  რაც შეეხება ძირითად მიღწევებს  - დემოკრატიის ხარისხი,  თავისუფალი არჩევნები, რაც ჩატარდა. ის, რომ მედია თავისუფალია, ის, რომ სასამართლო ხელისუფლება თავისუფალია პროკურატურის და ზოგადად, პოლიტიკური წნეხისგან",-აცხადებს კობახიძე.

  შეგახსენებთ, 2012 წლის 1 ოქტომბრის საპარლამენტო არჩევნები საარჩევნო ბლოკმა "ბიძინა ივანიშვილი-ქართული ოცნება" მოიგო. მათ ხმა მისცა მილიონ 184 588 ამომრჩეველმა, რისი პროცენტული მაჩვენებელიც 54,85-ია. "ნაციონალური მოძრაობის" სასარგებლოდ არჩევანი ამომრჩეველთა 40,43%-მა გააკეთა, რაც 872 336 ამომრჩეველს უდრის.